الأحد، 16 سبتمبر، 2012

صفر عالشمال


أنا صفر عالشمال لا عندى جاه ولا مال

 وحتى كلامى مش مسموع كانه مش متقال

و اه بحزن و اه بزعل بس الامل شغال
...

مرسوم في بحر خيال ..و توهت

وفى بحر خيالى انا ياما غرقت

و الموج بلعته لما شرئت

وقلت انا مت أكيد انا مت

ولسوء حظى لقيتنى انا عيشت

صحيت تنحت خوفت ومن دروختى اتكعبلت
..

وقعت ملقتش ليا ايد تتمد

صرخت مسمعنيش ولا حد

سكت وعرفت ساعتها انى لبست

يمكن في حيطة لا في سد
..

رجعت بضهرى اتشيلت

هموم تشوفها تقول ارطال

من قوتها صخر جبال

شيلت ولا اجدع شيال

وفى قسمت ضهرى عندى امال
..

لمحت ضحكة خطفتها

رسمتها على وشى قالوا محتال

حتى الضحكة في زمنا عايزة المال

مين قال في الفقر راحة البال مين قال

وفين الراحة فانك تبقى مجرد صفر على الشمال ..!!

الخميس، 28 يونيو، 2012

تساقط !!


  تساقط كما سقط قناعك 
وظهر لى الوجه القبيح..
 تساقط  فلقد ظهرت حقيقتك 
القلب الجارح لا الجريح..
 تساقط تماما كما يتساقط
 الورق الذابل فى الخريف..
تساقط حتى تصير ورقة 
تأخذك حيثما شائت الريح..
فينتهى بك الحال وحيدا
 مرميا تبكى على ضريح..


أما أنا فسأبقى شجرة عتيدة 
قوية لا يحركها الهواء..
جذورى تمتد تحت الأرض 
وغصونى تعلو الى السماء..
وإن كنت فى الربيع أبدو ازهو
بورقتك النضرة الخضراء..
فأبدو فى الخريف باهتة وكئيبة
بورقتك الذابلة الصفراء..
و لقد حملتك امدا  على غصونى 
فى حر الصيف وبرد الشتاء..
و الحب مواسم أعلم جيدا 
وهو بالنهاية قدر و قضاء ..!!


الأربعاء، 20 يونيو، 2012

متنسهوش

عارف الوقت اللى استنيت فيه مكالمة مجتش او اعتذار مسمعتوش ..
 و الوقت اللى سألت نفسك فيه ليه الحلم أدش و الايام مكملوش ..
متنسهوش !!
كل دمعة بكيتها على أمل بين ضلوعك اتكسر..
كل صدفة حلوة وطلعت وهم مش أكتر..
حتى كل أكل اتحط قدامك ومن حزنك مأكلتوش..
متنسهوش !!
كل قصة كانت هتبدأ وخلصت لانك محبتهوش..
لان لسة في واحد ساكن روحك منستهوش..
كل باب قفلته عليك بالضبة و مفتحتوش..
متنسهوش !!
كل ليل سهرته و من زعلك منمتهوش..
كل طريق مشيته يمكن تقابله و مقبلتوش..
كل الحب اللى اديته وراح عليك بلوش..
متنسهوش !!
متنسهوش و اتعلم يكون لجروحك تمن ..و ايه يفيد تبكى انهاردة و تصحى متعلمتش
بطل تسب وتشتم و تلعن فى الزمن ..  لحسن يفوت عمرك مكانك واقف  متقدمتش
دور أكيد هتلاقى دروس ورا المحن ..و خليك بنفسك فخور انك مستسلمتش

أخرج من جرحك و عيش حياتك و على حزنك دوس بس ...متنسهوش !!

الاثنين، 11 يونيو، 2012

حالى أزرق

هو بأيدى انى اضايق ولا أزهق ولا أحس بأنى هطق ؟؟
 ولا بأيدى انى اسرح واسكت واكون مش عايزة انطق ؟؟
 هو غلط أكون بطبيعتى و أبطل أمثل و ابقى أصدق ؟؟

لا مش بأيدى أنى احزن ..
 ولا كنش فى يوم بأديا افرح ...
وأحب أنا اصرخ ان أمكن..
 و محبش أطلع على المسرح...


 و لو بتقول أنا نكدية..
 تبقى بجد بتظلم فيا..
 و بتقيد فيا الحرية ..
 و هتضطرنى أنا فيك أجرح...


 وأجيب الضحكة منين و بكام ؟؟
 لو تتسرق راح اروح و اسرق ..
 ولا أشتريلى أنا صمغ و الزق..
 كام ضحكاية على شفايفى ..
و تبقى موهوم و تصدق ..
و أعمل إيه ماهو مش بالأيد .. 
 أن أنا حالى يكون أزرق ...!!

الاثنين، 14 مايو، 2012

أوعى تصدق أحساسك

عارف لما تحس الدنيا كدة مش ماشية مع احساسك ..
عارف لما لبس الدنيا كله ميجيش مقاسك..
عارف لما تحس الغربة فى وسط أهلك مع ناسك..


أوعى تصدق أحساسك..!!

عارف لما تنام بصعوبة و تصحى مش فايق ..
عارف لما نادر تلاقى إن مزاجك رايق..
و ناس كتير بتقولك انت اللى منشف راسك ..


أوعى تصدق احساسك ..


أوعى تصدق أحساسك و تسيب نفسك للوحدة  أوعى تقفل عليك ميت باب..!!
متسبش أيام حياتك تتحول كئيبة  و باردة       دور اكيد هتلاقى صحاب.. !!

و أن كانوا فى يوم باعوك اصحابك .. يمكن تلاقى فى يوم أحباب..
 او يمكن تلاقى ناس فى صفك ناس واقفة جنبك مع ان اسمهم أغراب ..
و ان ملقتش حد خالص و ان كنت بجد لوحدك مش هينساك التواب.......!!!!!!!!